Dr. Mieke de Droog a doctora na Universidad di Utrecht cu un tesis

Dr. Mieke de Droog, docente di Universidad di Aruba, recientemente a doctora na Universidad di Utrecht como doctorando externo di e Departamento di Ciencia Administrativo y di Organisacion (USBO).

Cu hopi brio y entusiasmo el a defende su tesis doctoral dilanti di un comision di evaluacion cu tabata consisti di Prof. V. Marcha, Prof. H. Ghorashi, Prof. A. de Ruijter, Prof. S. Schruijer, Dr. J. Boessenkool, presidente di comision Prof. Dr. P. Leisink, promotor Prof. P. Verweel y copromotor Dr. M. Gastelaars. Su esposo Ben King y su amiga del alma Francien Schoordijk a dun’e apoyo moral como padrino y madrina respectivamente, den presencia di un audiencia mixto cu persona procedente tanto di Aruba como di Hulanda.

Entre otro Prof. V. Marcha, den su funcion di Catedratico Extraordinario di Cohesion Social & Multiculturalidad na Universidad di Utrecht, a felicita Dr. Mieke de Droog pa ‘su estudio cientifico bon funda y solido, cu en particular tambe ta di gran importancia pa e region di Caribe’. Tambe e decano di Facultad di Arte y Ciencia, kende tabata presente, na nomber di Universidad di Aruba a felicita Dr. Mieke de Droog, kende ta traha na e facultad menciona, pa e grado obteni y su publicacion cientifico encuadra den un contexto Arubiano.

E titulo di e tesis doctoral ta: “E dia ey mi a stop di coreauto …” – Persona cu un of otro limitacion di bista na Aruba: Autodeterminacion, identidad y respet den bida diario.Dr-Mieke

Den e investigacion pa e tesis doctoral aki persona entrevista na Aruba ta conta con nan a bira total of particalmente ciego. Nan historia di bida ta para central den e investigaciony ta relacion’e explicitamente cu e contexto historico-cultural local. E personanan entrevista ta duna un bista di loke e limitacion visual ta nifica pa nan den nan bida diario, y cua ta e posibilidadnan cu nan mes tin pa siña anda cu e cambionan ey, sea den colaboracion cu otro persona y instancia of no. E estudio ta duna un idea di e complehidad di e limitacion. Dunamento di nificacion, anda cu perdida riba diferente tereno, y strategia pa confronta problema ta varia di persona pa persona y di situacion pa situacion. Specialmente den caso di limitacion visual cu a surgi mas laat den bida 2 tin incidente clave cu ta cay na bista, manera e momento di e diagnostico y e caso di ‘e dia ey mi a stop di core auto’ di e titulo di e tesis. Cu e visionnan presenta den e disertacion aki esnan cu un of otro limitacion di bista na Aruba por empodera nan mes, y otro hende y instancia por sostene nan na un forma mas dirigi. Loke mester boga p’e ta: desaroyo di maneho participativo den cual autodeterminacion y respet pa diferencia mester ta e puntonan di salida pa excelencia.

Diaranson anochi dia 30 di november pa 19:30 or Dr. Mieke de Droog lo tene un charla pa publico na Universidad di Aruba tocante e resultadonan di e investigacion. Mesora su tras lo tin lansamento di e buki. E buki ta obtenibel tanto den forma imprimi como den forma di buki electronico y buki pa scucha. E recaudacion di benta di e buki ta completamente destina pa FAVI.